mardi 7 mai 2013

ساعات القلق يعمل

نتخيل في روحي بعد درا قداش من عام يبدا عندي ولد في سن المراهقة و تجيني سنسون و تقلي :
- اسمعني نيم، باش نقلك حاجة على ولدك و لازم تاخذ منو موقف
- ما تقليش جاه مركاج في إنذار في جروب الكولاج !!!
- لا أما جارتنا شافتو هو و أولاد الحومة قاعدين تحت الحيط ...
- يتكيفوا في الزطلة ؟ تو بربي هاذي حكاية ! تي كيف أندادو الكل يا بنتي
- لا مش على هذاكة. الحكاية أخطر : يديفلوبي دوت نات 7.0
- شنوة شنوة ! الليلة إنحيلو جد بوه الكلب و غير ايجا حز عليه، تعرف اش يصير فيك و فيه ! الكلو من دلالك و حلانك ليه، بعد سيدي ينستالي ويندوز ايتين و إنت تخبي عليه

و نمشيلو ديراكت كيف تيجيفي تونس نفطة ندخل عليه للبيت و نسكر الباب ورايا :
- الله الله يا سي الشباب، عقاب عمري باش إطيحلي قدري في وسط الرجال. نعمان التومي و ما ادراك أرشيتاكت جي كانز أو و إكسبار هاش تي أم أل ديزنوف ولدو يديفلوبي دوت نات 7.0 تحت الحيوط.
- بابا ...
- وباية توبيك إنت و إلي معاك يا هامل. علاش مخليك مخصوص في حكاية ؟ حبيت على بي أس 14 شريتهالك و جبتلك معاها برو دوميل فانتديسات دوريجين من غير كراك، حبيت تليفون "أندرويد 12 كعك ورقة" قلت ما نحشمكش قدام أندادك و خذيتلك أيفون 18s هاك إلي عرضو أكبر من طولو، حبيت على فايسبوك عمتلك فورفي "سنية تومية ++" باش يكتبلك وحدو وحدو "bien dit" على ستاتوات البنات، ... اش تحب أخر ؟ اش مازلت تحبني نزيد نعطيك ؟ اللهم نموت و تعطيك كلوة و إلا رية !
- بابا اسمعني، راك فاهم الحكاية بالغالط
- بهيم ليك فاهم الحكاية بالغالط ؟ طارق الكحلاوي و إلا عدنان المنصر قدامك ؟
- يا بابا
- مانيش بوك يا اللي ما تحشمش. اه سنسبين بنت صاحبي، عمك عصام تخدم بالسي ++ و إنت تطلفح في الحوم بتبلات ويندوز ايتين و دوت نات 7.0 !!! من إليوم ما ثماش ويفي و الكوناكسيون كان بالكابل و حدك حد التويتر و غير يو بونتو "بركوس اديشين" حتى شي ما يتنستالا في تبلاتك. واضح ؟!! ماكانش ما غناني كان نطري مذهب بوك بكابل ار جي 45 ناقص فيشة
- باهي بابا سامحني معادش نعاود صنعتي
- حبلك ربي تعاودها

و نخرج و نمشي نسكر الروتور ويفي

3 commentaires:

Khaoula a dit…

hilarious xD

Mira.. a dit…

Mel 9la9 jit na3mel fi doura fel blog mté3ek.. merci pr le fou rire :p

CFTHammamet a dit…

http://www.cft-hammamet.com/